Прокурор асан Д.Баярмагнай: Сингапурт казино орсон нь ҮНЭН. Хулгай хийсэн бол намайг хилээрээ гаргах уу

Нийслэлийн Ерөнхий прокурор асан Д.Баярмагнай болон Улсын арслан Ц.Содномдорж нар Сингапурт казино тоглосон, хулгайн хэргээр саатуулагдсан. Улмаар ял авах магадлал тун өндөр байгаа гэх мэдээлэл цацагдсан билээ. Тиймээс прокурор асан Д.Баярмагнайтай утсаар холбогдож дараах тайлбарыг авснаа хүргэе.

-Сайн байна уу. Таны талаар нэг мэдээлэл цацагдсан. Тэрийг тодруулах гээд залгалаа?

-Тэр худлаа мэдээллийг үү?.

-Та Монголд байгаа юм уу. Эсвэл гадаадад байна уу?

-Би гэр бүлийнхээ хамт Энэтхэг улсад байна.

-Хэзээ ирэх үү?

-Удахгүй ээ. Хэд хоногоос очно.

-Хувийн ажлаар явсан гэсэн үг үү?

-Хувийн ажлаар явж байна. Би ажлаа өгөөд нэлээд хэдэн сар болж байна. Түүнээс хойш хувиараа ажиллаж байгаа.

-Таныг Сингапурт казино тоглосон. Хулгай хийсэн гэх мэдээлэл цацагдсан. Ямар учраас ийм мэдээлэл цацагдсан юм бол?

-Намайг элдвээр хэлж, хардаж л байдаг. Чи ямар мэдэхгүй биш дээ. Зүв зүгээр ажлаа хийгээд явж байхад өөр хүний зургийг тавиад "Прокурор Д.Баярмагнай гудамжинд шээлээ" л гэнэ. Энэ асуудлаар цагдаагаас тодруулсан. Тэгэхэд өөр хүний зураг байсан. Бас юу гэлээ. ЖДҮ-гээс зээл авсан л гэсэн. ЖДҮ байтугай ипотекийн зээлээ яая гэж байхад, юун ЖДҮ.

-Та Сингапурт очсон нь үнэн юм уу?

-Үнэн.

-Казино орсон уу?

-Орсон. Үгүйсгэхгүй. Гэхдээ бод доо. Хулгай хийсэн нь үнэн юм бол Сингапурын хилээр намайг гаргах уу. Би одоо Энэтхэгт байна. Итгэхгүй бол намайг Монголд очиход гадаад паспорт шалгана биз.

-Та улсын арслан Ц.Содномдоржийг таних уу?

-Танилгүй яах вэ. Миний хуурай дүү.

-Та түүнтэй холбогдож, яагаад ийм яриа гарсныг лавлаж асуусан уу?

-Асуусан. Тэгэхэд "Улсын арслан Мөнхбаатар гээд нутгийн ахтай таарамж муу байгаа. Тэр хүн л шоглох гээд тэгж ярьсан юм болов уу" гэж таамаглаж байна" гэж хэлсэн.

-Ц.Содномдоржийн найз нь түүнийг гадаадад байгаа. Очоод сар болж байна гэж надад хэлсэн юм л даа. Тэр одоо яг хаана байгаа юм бол?

-Сингапурт бэлтгэл хийж байгаа. Очоод сар болж байгаа байх.

-Та Сингапурт ямар ажлаар очсон юм бэ?

-Амихандаа хэлний бэлтгэлд хамрагдах санаатай очсон юм. Гэтэл төлбөр мөнгийг нь дийлэхгүй юм билээ.

-Та ажлаа яагаад хүлээлгэж өгсөн юм бэ?

-Сургуульд сурах санаатай. Нарийн зүйлийг Монголд очоод чамд дэлгэрэнгүй ярьж өгье.

Г.Нацаг-Эрдэнэ